LOTTO: salita ng taon 2010

     Tinakasan na ng haring araw ang buong kapaligiran. Ngunit nakapagtataka na nagsasalimbayan pa ang mga tao, mayroong galing ng opisina, mga guro mula sa paaralan o maging mga ordinaryong nilalang. Isang mahabang pila ang humarang sa aking daraanan. Kung anuman ang iniisip mo, nagkakamali ka. Walang libreng NFA rice na ipinamamahagi, walang shooting ng artista ang nagaganap, at lalong walang libreng pagkain mula sa isang sikat na restaurant. Mag-aalas syete na kasi ng gabi. Ang lahat ay hinahabol ang tumatakbong oras. Tatlumpung minuto mula sa sandaling ito ay magsasara na ang mga lotto outlets. Sa pagkakataong ito tama ang iyong nabasa at hindi pawang isang typograpical error lamang. Bata man o matanda, may ngipin man o wala, lahat sila’y aligaga at nagbabaka sakaling magiging susunod na milyonaryo mula sa kombinasyon ng numerong kanilang tangan. Umaasang mababago ang kapalaran sa pinaka mabilis na paraan, ang pagtaya sa LOTTO.

Isang walang kamatayang debate dito sa Pilipinas ang pag-usbong ng LOTTO. Dahil nga ito ay isang legal na pagsusugal. Bago pa man pumatok sa merkado ang larong ito ay nauna na ng nagningning ang jueteng. Ito ay isang ilegal na laro na maari kang tumaya mula piso at tayaaan ang swerteng numero para sa iyo. Tinangkilik ito ng masa dahil sa mura nitong presyo at naging paborito na rin lalong lalo na ng mahihirap sa probinsya.
Umani ng kritisimo ang gobyerno dahil sa sugal na ito, kung kaya’t nagpasya silang pigilan ang larong ito sa pagsakop sa sangkatauhan alinsabay nito ay ipinakilala nila ang LOTTO. Mas mahal ang tiket kaysa jueteng at mas marami na rin ang tinatayaaang numero gayunpaman mas malaki ang premyong makukuha rito na siguradong lahat tayo’y naghahangad.
bago ka pa man tuluyang takasan ng bait ay ipakikilala ko na sa iyo ang bida ng entablado.


Saan maaring malaman ang resulta ng tinayaang LOTTO?


Ang Philippine lotto draw ay isang programa sa telebisyon na ginawa ng Philippine charity sweepstakes office (PCSO) simula pa noong Marso 18, 1995 at mapakikinggan sa AM radio ng DZME. Ang nasabing programa ay ang palabas kung saan ibinibigay ang resulta ng LOTTO. Maari ring mabasa ang resulta sa mga pahayagan tulad na lang ng “bulgar”.
Bago magsimula ang pagbola ng LOTTO ay kinakailangan munang dumaan sa masusing proseso ang mga bola at blowing machines na gagamitin:
Sinusuring mabuti ang bawat blowing machines na gagamitin araw araw bago magsimula ang pagbola upang hindi magkaroon ng aberya kung sakaling magsimula na ito. Inilalagay sa portpolyo ang lahat ng bolang ginagamit upang hindi ito masira at magkulang. Tinitimbang din ang bawat bolang gagamitin, walang mabigat at wala ring magaan, lahat ay pare parehas ng sukat at bigat upang maiwasan ang dayaan. Pagkatapos ng ilang pagsusuri ay doon pa lamang maaring simulan ang pagbola.


Anu- ano ang mga kard na maaring tayaan sa LOTTO?


Ang 6/42 ay ang orihinal na lotto draw na nagsimula noong 1995. Una itong nilaro sa Luzon at ng kalaunan ay ipinakilala sa visayas at Mindanao. Mula sa kanyang pangalan, maaring tumaya ng anim na numero mula 1 hanggang 42. Para manalo, kinakailangang lumabas ang tatlong sa mga numerong tinayaang mo. Kung nakuha mo ang anim na iyon ay makukuha mo ang pinaka malaking premyo.
Ang LOTTO 6/45 naman ay may malaking pagkakahawig din sa unang nabanggit. Maaring pumili ng 6 na numero mula 1 hanggang 45. Kailangan ring makakuha ng kahit tatlong numero sa mga numerong tinayaan mo at kapag nakuha ang lahat ng numero ay mas malaki ang premyong makukuha kaysa sa 6/42.
Super LOTTO 6/49, mas mahirap naman makuha ang premyo kaysa sa unang dalawang nabanggit. Dahil mas marami na ang numerong pagpipilian. Simula 1 hanggang 49.
Grand lotto 6/55 ay ipinakilala nito lamang abril 2010. Pareho pa rin ang mekaniks ng paglalaro ngunit ang tanging ipinagkakaiba ay pipili ka ng numero mula 1 hanggang 55.
Ez2 LOTTO ay ibang iba sa mga unang kard na aking nabanggit. Simula 1 hanggang 31 ay kailangang makahula ka ng dalwang numero na magkasunod sa lumabas na kombinasyon.


Sino sino ang maaring tumaya ng LOTTO?


Pinahihintulutang tumaya sa larong ito ang kahit sino mang nilalang na may edad 18 taon gulang pataas. Kahit man ikaw ay isang dayuhan ay maari ka ring sumali sa sa LOTTO ditto sa pilipinas.
Kung sakaling ikaw man ang nanalo, paano mo makukuha ang iyong premyo?
Kailangang ilagay ang buong pangalan at pirma sa likod ng tiket na ipinanalo. Ang maliliit lamang na premyo ay maaaring kunin sa lotto outlet na iyong pinagtayaaan, samantala kung ang pinaka malaking premyo ang iyong nakuha ay maari lamang itong i-claim sa main office ng pcso.


Sariwa pa sa ating pandinig at marahil nakaukit pa sa dulo ng ating mga dila ang pagkapanalo ng isang Pilipino sa pinaka malaking premyo ng lotto sa kasaysayan na may kombinasyong  11-16-42-47-31-37 na sinasabing taga olonggapo city. Dahil na rin sa pagkapanalong iyon ay mayroon ding parte ang lotto outlet na kanyang pinagtayaan. Naaalala ko pa ng sinabi ng may-ari ng outlet na hindi ito ang kauna unahang pagkakataon na nanalo ng grand prize ang mga tumataya ditto.sa katunayan ito na ang kaapat na pagkakataon. Kay sainasabing masuwerteng tuna yang lotto outlet na ito.


Dahil nga unti unti nang gumuguhit ang LOTTO sa ating kasaysayan ay naglunsad n palabas ang GMA kapuso na pinamagatang “Pepito Manoloto”. Isa itong reality sitcom kung saan ipinapakita ang malaking pagbabago ng iyong buhay sa isang iglap na manalo ka ng pinaka malaking premyo sa LOTTO. Nagbibigay rin sila ng tips kung paano gamitin ang pera sa maayos at kapakipakinabang na paraan.


Ang lotto, para sa akin ay karapat dapat na tanghaling salita ng taon 2010. Nagging tampok ng usap-usapan ng mga barbero, mga kasambahay, tindera sa palengke at maging mga naglalaba sa batis. Gayunpaman, hindi natin dapat isaalang alang an gating kapalaran mula sa mga numerong ating inaalagaan. Oo nga’t hindi masamang mangarap, dahil iyon na lamang ang natitirang bagay sa mundo na maari nating gawin ng wlang katumbas na halaga. Ngunit wala pa ring mas dadaig sa “pagsisikap” mula doon ay matatagpuan mo ang susi ng pintong matagal mo ng hinahanap.